Афарин!

Cәхнәнән тау шишмәһе кеүек ташып сығып, ҡумыҙ, ҡурай моңдары һандуғас тауыштары менән үрелеп, тамашасылар йөрәгенең иң нескә ҡыл­дарын тирбәтте. Был илаһи моң сихри, тылсымлы көскә  эйә булды. Ансамбль сығыш яһағанда, тамаша залында “ҡылт” иткән тауыш та ишетелмәне. Ағас ҡумыҙ, тимер ҡумыҙ, ҡыл ҡумыҙ – ат сабышы, ҡоштарҙың һайрашыуы, шишмә тауышы… Тамашасылар бер нисә минутҡа үҙҙәрен урманда икән тип хис итте, аттарҙың  шишмәнән һыу эскәнен күҙәтте, ҡоштар тауышына һоҡланды… Бына ансамбль сығышын тамамланы, тамашасылар   дәррәү алҡыштарға күмде.

Район юбилейында булған был хәлгә һис кенә аптырарлыҡ түгел, сөнки Урмансы ауылының “Етегән” ҡумыҙсылар ансамбленең илаһи моңон Малаяҙ район мәҙәниәт йортонда ғына түгел, ә һәр ерҙә көтөп алалар. Көтмәгәндә ойошҡан “етегәндәр” күпме йылдар, күпме һынауҙар аша үтһә лә, берҙәм, көслө ансамбль булып ҡалды. Уның тарихы тураһында етәкселәре, район тормошонда ҡайнап йәшәүсе Сафуан Сәйетғалин бына нимә һөйләй:

 – Ул саҡта мин мәктәптә эшләй инем. Уҡыусылар килде лә : “Ағай, беҙҙе йырларға, бейергә өйрәтегеҙ әле”, – тип үтенде. Уларҙың һүҙен ҡаҡмай, шөғөлләнә башланыҡ. Уҡыусылар етәү ине. Шуға ла ансамблгә “Етегән” тип исем бирҙек.

Башҡортостан Республикаһы һаулыҡ һаҡлау системаһында оҙайлы уңышлы хеҙмәте өсөн Зөлфиә Бикмөхәмәтова, Наил Хужин, Рәғиҙә Нуриева, Илгиз Шакиров БР Һаулыҡ һаҡлау министрлығының Почет грамотаһына лайыҡ булды.

Юғары һөнәри оҫталығы һәм оҙайлы намыҫлы хеҙмәте өсөн Валерий Ғәйнетдиновҡа БР Торлаҡ-коммуналь хужалыҡ министрлығының Почет грамотаһы бирелде.

Граждандарҙың һаулығы һағына индергән өлөшө һәм әүҙем йәмәғәт эшмәкәрлеге өсөн Ришат Солтанов БР Дәүләт Йыйылышы – Ҡоролтайҙан Рәхмәт хаты алды.

Хеҙмәт уңыштары, юғары һөнәри оҫталығы өсөн Алина Ишмөхәмәтова БР Сауҙа һәм ҡулланыусылар хоҡуғын яҡлау буйынса дәүләт комитеты Почет грамотаһы менән бүләкләнде.

Номинанттар төрлө өлкәнән – дауалауҙан производство эшмәкәрлегенә тиклем. Шифахана хакимиәте хеҙмәткәрҙәрен лайыҡлы награда алыуы менән ҡотлап, уларға ныҡлы һаулыҡ, оптимистик рух, именлек һәм артабанғы хеҙмәт уңышы теләй.

 

Башҡортостандың йөҙөк ҡашы булған гүзәл тәбиғәтле Бөрйән районында үткән “Урал батыр” эпосын ятҡа һөйләүсе йәш сәсәндәр бәйгеһендә йыл һайын Салауат районы уҡыусылары алдынғылыҡты бирмәй.

“Урал батыр” эпосы кешелекте борсоған мәңгелек һорауҙарҙы туплап, халыҡтың уй-ҡараштарын сағылдырып, уҡыусылар өсөн тормош дәреслеге, аҫыл рухи ҡомартҡы булып тора.Бөрйән ерлегендә тыуған “Урал батыр” эпосы – башҡорт халҡының иң ҙур ғорурлығы. Урал тауҙарының һәр үҙәне, мәмерйәһе, йылғалары бөгөн дә халыҡ батырының эҙҙәрен һаҡлай. Халҡыбыҙ ауырлыҡтарҙы еңеп, үҙен милләт булараҡ һаҡлап ҡалыуы – Урал батыр васыятына тоғролоҡ билдәһе ул. Мәртәбәле сәсәндәр ярышының маҡсаты ла ата-бабалар аманатына тап төшөрмәү, халыҡтың рухи көсөн үҫтереү, туған телдең статусын күтәреү. Ысынында башҡорт һүҙ сәнғәтенең камил һәм үлемһеҙ ҡаҙаныштарының береһе – “Урал батыр” эпосы – яҙма әҙәбиәтте байытып, даими тулыландырып торған мәңгелек шишмә ул.

Республикала уҡыусылар өсөн бындай байрамдың 17-се тапҡыр уҙғарылыуы бик тә әһәмиәтле. Туған телебеҙҙең байлығын үҙләштереү – тыуған ерҙең тарихын белеү ул; шул саҡта ғына үҙең йәшәгән ергә хөрмәт уяна, һаҡсыл мөнәсәбәт тәрбиәләнә.