“Шиғыр яҙ ҙа – Ҡыш бабайҙан күстәнәс от” конкурсында сираттағы еңеүсебеҙ Азалия Әлибаева редакцияға бүләген алырға әсәһе менән килгәйне. Алгиза Айрат ҡыҙының әйтеүенсә, Азалия “Йүрүҙән” гәзите иғлан иткән конкурста йыл һайын ҡатнаша. Быйыл да ул үҙ көсөн һынап ҡарап, беҙҙе бик матур, йөкмәткеле шиғыр менән ҡыуандырҙы. 

Азалия Мөрсәлим урта мәктәбенең 7-се класында белем ала. Тырыш ҡыҙ тик яҡшы билдәләргә генә уҡый, мәктәп тормошонда әүҙем. Йырларға, һүрәт төшөрөргә әүәҫ. Шулай уҡ Азалия  саңғы шыуырға, спорт менән шөғөлләнергә ярата. Ҡыҙҙың еңел атлетика, саңғы ярыштары буйынса районда призлы урындар яулауы ла маҡтауға лайыҡ. 

 –  Үҙемде еңеүселәр араһында күргәс, шатландым. Бүләктәр ҙә шәп, бик ныҡ оҡшаны. Ошо яңы блокнотҡа матур-матур шиғырҙар яҙырмын,  – тине Азалия.

Яңы йыл алдынан беҙ, Янғантау урта мәктәбенең башҡорт теле һәм әҙәбиәте уҡытыусыһы Алия Ишбулдина, район йәштәр советы рәйесе Гүзәл Юлдашбаева һәм Торналы балалар баҡсаһы мөдире Алиса Кәбирова, Ҡырым тарафтарына юлландыҡ. 

Маҡсатыбыҙ   республикабыҙҙың төрлө төбәктәренән “Артек” халыҡ-ара балалар үҙәгендә ял итеүсе балаларҙы алып ҡайтыу ине. Үҙебеҙгә ҡалһа, ошо бурысты беҙгә ышанып тапшырған республика Йәштәр сәйәсәте һәм спорт министрлығының ышанысын аҡлау өсөн бар тырышлығыбыҙҙы һалып, “Артек”та 21 көн ял иткән 50 баланы иҫән-һау ата-әсәләренә тапшырыуға бик яуаплы ҡараныҡ. Алғараҡ китеп  шуны әйтәйем, “Өфө” аэропортында беҙҙе һәм балаларҙы ата-әсәләр ҡолас йәйеп, кинәнешеп ҡаршы алды.

24 декабрҙә “Өфө” аэропортынан самолет менән Мәскәүгә, унан һуң Ҡырымдың баш ҡалаһы Симферополгә остоҡ. Ҡунаҡханаға урынлашып, Ҡырымда экскурсияла йөрөп, танышып, бығаса күҙ күрмәгән йылы яҡтарҙы байҡап, ял итеп, төрлө осрашыуҙарҙан ҡәнәғәт ҡалып, ҙур тәьҫораттар алып ҡайттыҡ.

“Артек”та ял итеүсе балалар араһында беҙҙең райондан Торналы урта мәктәбенең 7-се класс уҡыусыһы Фидель Сафин да бар ине. Балалар унда уҡыуҙарын да дауам иткәндәр. Әйткәндәй, улар яңы технология буйынса белем алған. Был заезда барыһы 13 отряд эшләгән. Фидель иһә “Оливье” исемле 4-се отрядта булған. Шуныһы иғтибарға лайыҡ, балаларға тик “4” һәм “5” билдәләре генә ҡуйғандар һәм һәр бала үҙе теләгән түңәрәктә шөғөлләнгән.

Сулпан ауылы егете Азат Фәнил улы Кәримов былтыр мартта Салауат ҡалаһында Рәсәй кубогының бишенсе этабында спорт мастерлығына норматив тапшырҙы. Ул турникта 40 (!) мәртәбә күтәрелеп, 10 километр алыҫлыҡҡа саңғыла йүгереп һәм  пневматик мылтыҡтан сәпкә атып, ошо спорт буйынса юғары квалификацияға лайыҡ булды.

Саңғысыға ҡышҡы полиатлон буйынса Рәсәй спорт мастеры таныҡлығын һәм күкрәк билдәһен яңы йыл алдынан район хакимиәтендә тапшырҙылар. Район башлығы Ғәли Хәйретдинов уға иҫтәлеккә ҡул сәғәте лә бүләк итте.

Әйтергә кәрәк, Азат Кәримовтың ғаиләһе лә сәләмәт тормош рәүеше алып бара. Үҙе ул газ хеҙмәтендә эшләһә, ҡатыны Земфира Фуат ҡыҙы – Янғантау урта мәктәбендә башланғыс кластар уҡытыусыһы, ул да саңғысы, теннис менән әүҙем шөғөлләнә. Нәзир, Йәлил һәм Малик исемле улдар үҫтерәләр.

Азаттың ата-әсәһе Фәнил Сәйфулла улы менән Флүрә Мөхәмәт ҡыҙы ла заманында саңғы ярышы буйынса спортсы, мәрхүм ағаһы Салауат полиатлон буйынса Халыҡ-ара спорт мастеры булған. Өфөлә йәшәүсе һеңлеһе Вилиә – ошо төр буйынса спорт мастерлығына кандидат.

Азат Кәримовты спортта юғары ҡаҙанышҡа ирешеүе менән ҡотлайбыҙ.

Таймый ауылында йәшәүсе Бөйөк Ватан һуғышы яугиры, ҡарттайыбыҙ Тәлғәт Хәбир улына тиҙҙән 90 йәш тула. Ул яу юлы үтеп, ғүмер буйы совхозда механизатор булып эшләгән.

Олатайыбыҙ Тәлғәт Хәбир улы 1926 йылда тыуған. Таймый ауылындағы мәктәпте тамамлай. Һуғышҡа 1943 йылда китә. Хәрби әҙерлек үтеп, илдең көнсығыш яғына оҙатыла. Яугир ҡарттайым унда япон милитаристарына ҡаршы аяуһыҙ алыша. Уның батырлығын күкрәге тулы орден-миҙалдары дәлилләй.

Тәлғәт Мәҡсүтов Еңеү көнө тантана иткәндән һуң, дүрт йыл үткәс кенә тыуған яғына ҡайта. Яраҫтауҙа уҡып,  совхозға эшкә керә. Хаҡлы ялға сыҡҡансы унда механизатор булып тоғро хеҙмәт итә.

Бөгөн олатайыбыҙ Лида әнкәйебеҙ менән матур ғүмер кисерә. Дүрт бала үҫтергәндәр. Ҡыҙғанысҡа ҡаршы, бер улдары әрмелә һәләк булды. Ә өс балаһы әле һәр береһе үҙ аллы донъя көтә. Ҡарт көндәрендә олатай менән өләсәйебеҙ 7 ейән-ейәнсәре, 6 бүлә-бүләсәре ҡыуанысын татып йәшәйҙәр.

Һуғышты үтеп, ауыл хужалығында фиҙаҡәр хеҙмәт итеп, матур тормош кисергән ҡарттайыбыҙ Тәлғәт Хәбир улы Мәҡсүтовты оло ғүмер байрамы менән ҡотлап, уға һаулыҡ, бәхетле ҡартлыҡ, беҙҙе артабан да шатландырып йәшәргә насип итһен.

 

Районыбыҙҙың көрәшселәре, алдынғы спортсылары Альфред Ғәлин, Рөстәм Аҙнағолов һәм Ранис Алтынбаевтың яҡты иҫтәлегенә бағышланған милли көрәш буйынса 5-се асыҡ зона турниры быйыл да улар уҡып сыҡҡан   Әлкә  мәктәбендә  үткәрелде. Унда Ҡыйғы, Балаҡатай, Дыуан, Мәсетле һәм Салауат райондарынан килгән барыһы 100-ән ашыу спортсы ҡатнашты. 

Тантаналы өлөш ярыш флагын күтәреүҙән башланды, шулай уҡ спорт залында Рәсәйҙең һәм Башҡортостан Республикаһының гимндары яңғыраны. 

Турнирҙы мәктәп директоры Әлфиә Садиҡова асып, барыһына ла иң изге теләктәрен еткерҙе. 

— Бар ғүмерен районды үҫтереүгә арнаған яҡташтарыбыҙҙың яҡты иҫтәлеге улар үлгәндән һуң да беҙҙең күңелдәрҙә һаҡлана, батырҙарҙың иҫтәлегенә төрлө турнирҙар үткәрелә,  – тине Әлкә ауылы биләмәһе башлығы Руслан Низамов . Артабан сараға йыйылыусылар беҙҙең эргәбеҙҙә булмаған спортсыларҙы бер минут тынлыҡ менән иҫкә алды. Иртә ғүмерҙәре өҙөлгән егеттәрҙең әсәләре Рузида Әкрәм ҡыҙы  һәм Илзира Фәрхит ҡыҙының сығышы тулҡынландырғыс һәм ҡыҙғаныс булды. Рөстәм Аҙнағоловтың ҡыҙы Ангелинаның "Минең атайым спорт мастерлығына кандидат" тип аталған эҙләнеү эшен дә сараға йыйылыусылар ҙур иғтибар  менән тыңланы. 

"Батыр" клубы  тренеры, БР-ҙың атҡаҙанған физкультура хеҙмәткәре Адик Нурмөхәмәтов бәйгеселәрҙе, ҡунаҡтарҙы сәләмләп, спортсыларға ярышта уңышлы сығыш яһауҙарын теләне. 

22 декабрҙә Өфө ҡалаһына Башҡортостан Республикаһы Башлығы шыршыһына барыу бәхете тейҙе.

Өфөгә барып төшкәс тә беҙҙе Ҡыйғы районы уҡыусылары менән бергә  “Салют” һауыҡтырыу лагерына урынлаш­тыр­ҙылар. Байрам шифаханала уҡ башланды. Кисен әкиәт геройҙары ҡатнаш­лығында Яңы йыл дис­котекаһы ойошторолдо. 

Иртәгәһен “Баш­ҡортостан” дәүләт концерт залында төп шыршы байрамына бөтә Башҡортостандан 800-ләп уҡыусы йыйылды.

Әкиәткә сәйәхәт концерт залының фойеһында уҡ башланды. Тантаналы өлөштә, әлбиттә, яңы йылдың төп тылсымсыһы – Ҡыш бабай үҙенең ейәнсәре Ҡарһылыу менән ҡаршы алды. Уҡыусыларҙы Башҡортостан Башлығы исеменән республика Хөкүмәте Премьер-министры урынбаҫары Салауат Сәғитов ҡотланы.

Һуңынан беҙ “Яңы йыл биттәре буйлап, йәки Әкиәттәрҙе урлаусылар” театрлаштырылған тамаша ҡараныҡ. Ниндәй генә әкиәт геройҙарын күрмәнек, шулай ҙа иң яҡыны “Мөғжизәләр иленән” Алиса булғандыр. Яңы йылға мөғжизә булып әкиәттәр беҙгә кире ҡайтты.

Асыҡ, сағыу декорациялар, геройҙарҙың матур костюмдары, ә иң мөһиме, балаларҙың шатлығы, яңы дуҫтар онотолмаҫлыҡ тәьҫораттар ҡалдырҙы.

Яңы йыл шыршыһы иҫтәлеге итеп барыһына ла йомшаҡ уйынсыҡтар – йыл символы Маймыл, китап һәм күстәнәстәр бүләк иттеләр.

Ошо тылсымлы илгә барып ҡайтыуҙа ярҙам күрһәткән район хакимиәтенә, мәғариф бүлегенә, ЮХХДИ бүлексәһе, делегация етәксеһе Әминә Кәшфетдин ҡыҙы Ғималетдинова, Ҡыйғы район мәғариф бүлеге методисы Диана Кәбирйән ҡыҙы Зәбиғуллина, водитель Владир Ҡадировҡа рәхмәтебеҙҙе еткерәбеҙ.

Башҡортостан Республикаһы Конституция көнө уңайынан Салауат Юлаев музейында  тантаналы саралар үтте. 

Район Хакимиәтенең кадрҙар һәм биләмәләр менән эшләү бүлеге начальнигы Гөлнур Бәширова барыһын да байрам менән ҡотлап, Конституция тураһында һөйләне.   Балалар ижады йорто директоры Ирина Ғилмийәнова  “Дәүләт символикаһын иң яҡшы белеүсе” конкурсына йомғаҡ яһап, был бәйгелә әүҙем ҡатнашҡан Арҡауыл, Торналы, Лағыр һәм Йыланыш мәктәптәрен маҡтап телгә алды. Район Советы секретары Андрей Сергеев һәм мәғариф бүлегенең методик кабинеты мөдире Миләүшә Садиҡова еңеүселәрҙе ҡотлап, уларға Маҡтау грамоталары тапшырҙы. 

Һәр кеше тыуыу менән үҙ иленең гражданы була һәм иң тәүҙә тыуыу тураһында таныҡлыҡ  ала. Йыл башынан районда 360 бала донъяға килгән. Күптән түгел районда үҙенсәлекле һан аҫтында тыуған һәм теркәлгән балаларға   Тыуыу тураһында таныҡлыҡты тантаналы тапшырыу акцияһы старт алды. Байрам барышында ЗАГС бүлеге начальнигы Анастасия Сергеева 333 һаны аҫтында тыуған Лағыр ауылынан Нелли Әхтәроваға тәүге документын һәм бүләк бирҙе. Гөлнур Бәширова ла ғаиләгә иң изге теләктәрен еткереп, район Хакимиәте исеменән иҫтәлекле бүләк тапшырҙы. Сығыштар араһында район мәҙәниәт бүлеге хеҙмәткәре Альбина Ғәйфуллина йырҙары менән тамашасыларҙың күңелен асты.

 Шулай уҡ байрамда 60 йыл бергә татыу ғүмер иткән Татар Малаяҙы ауылынан Ғилемхан һәм Сания Нурҡаевтарҙы тәбрикләнеләр. Уларҙы Малаяҙ ауылы биләмәһе башлығы Светлана Ишмөхәмәтова һәм Анастасия Сергеева Гәүһәр туйҙары  менән ҡотлап, бүләкләп үтте.

"Шиғыр яҙ ҙа  – Ҡыш бабайҙан күстәнәс от!" конкурсында Әлкә ауылынан Хәтимә Зиннурова төп еңеүсебеҙ булды. Уға беҙ вәғәҙә иткән Ҡыш бабай күстәнәстәрен: бер тоҡ тәмлекәстәр һәм экзотик емеш   – ананас бүләк иттек. 

Хәтимә Ишбулды ҡыҙы ғүмерен балалар уҡытыуға бағышлаған. Ул Әлкә урта мәктәбендә 36 йыл башланғыс кластарға белем бирә. Тырыш, фиҙаҡәр хеҙмәте өсөн “Рәсәй Федерацияһының дөйөм белем биреүҙең почетлы хеҙмәткәре”, өлкән уҡытыусы исемдәренә лайыҡ була. 

Еңеүсебеҙ шиғырҙы илһам килгәндә үҙе өсөн генә яҙа, бындай һәләте булғанын береһенә лә белдермәй. 

 – Конкурс иғлан ителгәнен күргәс, бер тынала шиғырҙы ултырып яҙҙым да, туғандарым аша редакцияға ебәрҙем. Шиғырҙың юлдары күңелдә үҙенән-үҙе теҙелде: күптәнән "Йүрүҙән" де яратып уҡығас, гәзиттең киләсәге тураһында борсолоп йөрөй инем. Конкурста еңеүемә бик шатмын!   – тип ҡыуанысын йәшермәне тоғро дуҫыбыҙ. 

Ә беҙҙең ҡыуанысыбыҙ – тап Хәтимә Ишбулды ҡыҙы кеүек ижадҡа бай, тырыш һәм «Йүрүҙән» де яратып уҡыусылар булыуы! Беҙҙең менән ҡалғанығыҙ, гәзит менән дуҫтарса мөнәсәбәттә булғанығыҙ өсөн ҙур рәхмәт һеҙгә! 

Яңы йыл – иң яратҡан, көтөп алынған шатлыҡлы байрамдарҙың береһе. Ул традицияларҙың күсәгилешлеген символлаштыра, матур итеп биҙәлгән шыршы, айырыуса ҡыуаныслы мөхит һәм мөғжизәгә ышаныс   беҙҙең бары­быҙҙы ла берләштерә. Туғандар, дуҫтар һәм бар ил менән бергә Кремлдең тантаналы куранттар һуғыуын тыңлап, илебеҙҙең яңы үҫеш дәүеренә, йәшәйешебеҙҙең яңы осорона аяҡ баҫабыҙ.

2015 йылды оҙатып, муниципаль район хакимиәте, учреждениелар, предприятиелар, ойошмалар эшмәкәрлегенә йомғаҡ яһайбыҙ, эш йүнәлешенә яңы өҫтөнлөктәр билдәләйбеҙ, яңы маҡсаттар ҡуябыҙ. Уҙған йыл ябай булманы, әммә беҙ уны лайыҡлы һөҙөмтәләр менән тамамлайбыҙ. 2015 йыл  районыбыҙ, тыуған республикабыҙ һәм Бөйөк Тыуған илебеҙ өсөн үтә әһәмиәтле булды. Бар ил менән 1941 – 1945 йылдарҙағы Бөйөк Ватан һуғышында Еңеүҙең 70 йыллығын билдәләнек. Был иҫтәлекле йылда республиканың баш ҡалаһы – Өфө бер нисә көнгә ШОС һәм БРИКС илдәре өсөн мөһим сәйәси-иҡтисади ҡарарҙар ҡабул итеү үҙәгенә әйләнде.