26 февралдә Лағыр ауылы мәҙәниәт йортонда район кимәлендәге йыр бәйгеһе үткәрелде. Төрлө ауылдарҙан килгән конкурсанттарҙы ҡайнар сәй менән ҡаршылап, теркәү ойоштороу менән сәхнәгә Лағыр урта мәктәбе уҡыусылары сыҡты. 

Хәбир Ғәли­мов­тың бала сағын һүрәтләгән был сценарийҙа төрлө класс уҡыусылары ҡатнашты. Боронғо уйындар уйнанылар, халыҡ йырҙарын да башҡарҙылар. Бигерәк тә 1-се класс уҡыусыһы Нил Бәшировтың яҡташыбыҙ репертуарынан “Ялсығол” йырын башҡарыуы айырыуса оҡшаны. Уға музей фондынан махсус бүләк һәм Маҡтау ҡағыҙы тапшырылды.

Художество етәксеһе Рәүиә Яныбаева халыҡ йырҙарын башҡарыусыларҙы берәм-берәм сәхнәгә саҡырып, улар тураһында һөйләп, йырҙарҙың йөрәктән сыҡҡан моңдары менән һоҡланып, матур-матур һүҙҙәр менән аңлатып, бәйгене бик оҫта итеп алып барҙы.

Үҙенең скрипка моңо менән сәхнәне биҙәгән Зөбәржәт Ғәйфуллинаның сығышын халыҡ алҡышлап ҡаршы алды. Земфира Әхтәрова ла, Хәбир Ғәлимовтың пианинола уйнағанын һөйләп, “Былбылым” йырын башҡарҙы. Ә инде башҡа бәйгеселәр ҙур оҫталыҡ менән “Уралым” йырын йырланы. Һөҙөмтәлә Янғантауҙан Азамат Нуриев  Гран-при  яуланы, Ишембайҙан Винер Ҡәҙербаев 1-се урын алды. Икенсе урынға Мәсетле егете Вадим Хизбуллин “Арғужа” йырын башҡарып сыҡты. Ә инде Лағырҙан Гөлсәсәк Нурмөхәмәтова ҡарт олатаһының яратып йырлаған “Сәлимәкәй”ҙе башҡарып, 3-сө урынға лайыҡ булды.

Элек-электән уҡытыусылар белем биреүҙе тәрбиә эше менән тығыҙ бәйләнештә алып бара. Ысын педагог һәм тәрбиәсе шиғыр ятлатһынмы, йыр өйрәтһенме  – көн һайын да баланың рухын үҫтереү, белемен арттырыу, уны шәхес итеп тәрбиәләүгә ҙур тырышлыҡ һала.

Шуныһы ҡыуаныслы, районыбыҙҙа эшен мөкиббән китеп яратҡан, үҙ һөнәренең оҫтаһы булған, белемле, тәжрибәле уҡытыусылар һәм тәрбиәселәр бихисап. Районыбыҙҙа нисәнсе йыл рәттән уҙғарылған "Йыл уҡытыусыһы" һәм "Йыл тәрбиәсеһе" конкурстары быға дәлил булып тора.

2 мартта район мәҙәниәт йортонда үткән "Йыл уҡытыусыһы  – 2020" һәм "Йыл тәрбиәсеһе  – 2020" бәйгеләренең йомғаҡлау тантанаһына кон­кур­санттарҙан тыш, мәктәп директорҙары, уҡытыусылар, тәрбиәселәр, мәғариф ветерандары, ауыл би­ләмәләре башлыҡтары саҡырылғайны.

Райондың мәғариф бүлеге етәксеһе Нелли Рәхмәтуллина:

 – 2020 йылға районда мәғарифты үҫтереү буйынса план ҡабул ителде. Бөгөн уҡытыусыларҙың уртаса йәше 43-45-кә тигеҙ. Шуның өсөн мәктәптәргә яңы технологиялар индереүе ҡыйыныраҡ. Коллективта тәжрибәле өлкән йәштәге педагогтар ҙа, йәштәр ҙә булырға тейеш. Уҡытыусылар һәм тәрбиәселәр  – улар йәш быуынды тәрбиәләүсе, ғөмүмән,   беҙҙең киләсәгебеҙгә ҙур йоғонто яһайҙар,  – тип педагогтарҙың һәм тәрбиәселәрҙең эшен юғары баһалап, уларға рәхмәттәрен белдерҙе. 

Элек-электән тормошобоҙҙа ағинәйҙәр һүҙе ҙур әһәмиәткә эйә булған. Бөгөн халыҡ, бигерәк тә йәштәр ағинәйҙәрҙең аҡыллы кәңәштәренә, өгөт-нәсихәтенә мохтаж. Ағинәйҙәр мәктәбен тергеҙеү маҡсаты менән республиканың һәр районында ағинәйҙәр ҡоро булдырылды. Бындай ҡор беҙҙең районда ла бөгөнгәсә уңышлы эшләп килә.

Халыҡ-ара ҡатын-ҡыҙҙар көнө алдынан  Салауат Юлаев музейында ағинәйҙәр ҡороноң сираттағы йыйылышы үтте. Райондың баш ағинәйе Сажиҙә Миһранованың тырышлығы менән был йыйылыш ябай ғына булманы, ә "Алтын тирмә"   викторинаһы рәүешендә ойошторолдо. Был сараға ҙур теләк менән килгән райондың ветерандар советы, ҡатын-ҡыҙҙар советы етәкселәрен һәм ағинәйҙәрҙе район Хакимиәтенең кадрҙар һәм биләмәләр менән эшләү бүлеге начальнигы Гөлнур Бәширова, Берҙәм Рәсәй партияһының урындағы башҡарма комитеты етәксеһе  Маргарита Сәфәрғәлина сәләмләп, ағинәйҙәр ҡороноң әһәмиәте тураһында билдәләп үтте. 

21 февралдә “Салауат Юлаев” тарихи нәфис фильмы беренсе тапҡыр тамашасы хөкөмөнә сығарылыуына 75 йыл тулды. Ошо уңайҙан Әлкә ауылында билдәле фильмды күрһәттеләр. Әлкә клубына милли батыр тураһында фильмды ҡарарға бар ауыл халҡы йыйылды.

Быйыл тарихи фильмдың төшөрөлөүенә 75 йыл булһа, ә уның режиссеры Яков Протазановтың тыуыуына ла 135 йыл тулды. Был ике дата тап Рәсәй киноһы йылына тура килде. Ни өсөн һуң тап рус режиссеры башҡорт халҡының милли геройы хаҡында кино төшөргән икән?

Яков Протазановтың ҡулына Степан Злобиндың Салауат Юлаев тураһында китабы килеп эләгә. Уны уҡып сыҡҡас, башҡорт халҡының милли геройы тураһында кино төшөрөү теләге менән яна башлай. Фильмды 1939 йылда төшөрә башлай. Сценарийын С. Злобин үҙе һәм Г. Спевак яҙа. Фильмдың күп өлөшө Ишембай районының Көҙән ауылында төшөрөлә.

Драмтеатрҙың билдәле артистары Х. Бохарский, В. Ғәлимов, Ғ. Минһажев, Р. Сыртланов һ.б. ҡатнаша. Төп ролде – Салауатты йәш актер Арыҫлан Мөбәрәков бар һәләтен, күңелен һалып башҡарып, юғары ҡаҙанышҡа өлгәшә. “Салауат Юлаев” нәфис фильмы башҡорттар араһында ғына популярлыҡ яулап ҡалмай, ә тотош илдә дан  ҡаҙана. Хатта Бөйөк Ватан һуғышы  сыҡҡас, илһөйәрлек тәрбиәләүсе фильмдар менән бергә “Салауат Юлаев” фильмын да күрһәтергә рөхсәт ителә.

Яҡташыбыҙ, популяр йырсы Фәриҙә Ғаззалованың 

Өфөләге беренсе концертына рәхим итегеҙ! 

5 мартта район мәҙәниәт йортонда “Салауат һылыуы” гүзәллек бәйгеһе үтәсәк.

Конкурста һайлап алыу турын үткән һигеҙ һылыу финалда көс һынашасаҡ. Был юлы бәйге башҡорт, татар, рус ҡыҙҙары араһында уҙғарыла. Һылыуҡайҙар финалда үҙ телендә үҙен таныштырыу, йыр-бейеү, актерлыҡ этюды, дефиле, ҡул эштәре буйынса ярышасаҡ.

“Салауат һылыуы” гүзәллек бәйгеһе 16.00 сәғәттә башлана.

Малаяҙ ауылында Салауат Юлаев музейында фоторәссам Рәмил Килмәмәтовтың “Барыһы менән аулаҡта…” тигән фотокүргәҙмәһе асылды.

Был күргәҙмә “Ағиҙел” республика халыҡ ижады үҙәге фотоклубының 40 йыллыҡ юбилейы уңайынан ҡуйылды. Фоторәссамдың билдәле сәйәсмәндәр, күренекле шәхестәр, ябай кешеләр, тәбиғәт, иҫтәлекле урындарҙы һ.б. күренештәрҙе төшөргән фотоһүрәттәре музей фойеһы стеналарында урын алды. Күргәҙмәне асыу тантанаһына  Балалар сәнғәт мәктәбе һәм Балалар ижады йорто тәрбиәләнеүселәре, сәнғәт һөйөүселәр саҡырылды.  Район башлығы урынбаҫары Владислав Килдейәров, Салауат Юлаев музейы директоры Зилә Садиҡова ла сарала ҡатнашты.

Фоторәссам тәҡдиме буйынса ҡыҙыл таҫманы иң йәш рәссамдар ҡырҡты. Артабан Рәмил Исмәғил улы ҡунаҡтарҙы үҙ эше менән таныштырҙы, ижади пландары менән уртаҡлашты. Салауат Юлаев музейына үҙенең фотоальбомдарын бүләк итте. Һуңынан йәш рәссамдар һәм һәүәҫкәр фото төшөрөүселәр менән осрашыу булды.

Рәмил Исмәғил улы Килмәмәтов – Башҡортостандың халыҡ рәссамы, Рәсәй фоторәссамдары союзы ағзаһы, Салауат Юлаев исемендәге премия лауреаты, Республика халыҡ ижады үҙәгенең кинофото бүлек мөдире.

 

Райондың һигеҙ ауылында “Реаль эштәр” көнөнә ярашлы 

спорт-мәҙәни саралар үтте.

21 февралдә Сыбаркүл ауылы гөр килеп торҙо. Ватанды һаҡ­лау­сылар көнөнә һәм ауылдашыбыҙ, саңғы буйынса спорт мастеры Ривал Ҡазыевтың яҡты иҫтәлегенә арналған саңғы байрамы ойошторҙоҡ. Был сараны икенсе йыл үткәрәбеҙ. Былтыр Лағыр урта мәктәбендә ҙур саңғы байрамы ойошторолғайны. Быйыл был сара спортсының тыуған ауылында үтте.

Тәүҙә бар ауыл халҡы яу яланында ятып ҡалғандар һәм Еңеү менән ҡайтҡандар иҫтәлегенә ҡуйылған мемориал комплексҡа сәскәләр һалды, яугирҙарҙы бер минут тынлыҡ менән иҫкә алдыҡ. Һуңынан ир-егеттәребеҙҙе байрам менән тәбрик итеп, клуб мөдире Минзилә Ҡазиханова, хаҡлы ялдағы физкультура уҡытыусыһы Радик Мөхәмәтйәнов, мәрхүмдең тормош иптәше Рәйсә Ҡазыева, апаһы Нәжибә Ғирфановалар телмәр тотто.

Саңғысылар тауға саңғыла уҙышырға китһә, оло апайҙарыбыҙ Рәзимә Мөхәмәтйәнова етәкселегендә скандинавса йөрөргә ауылдың үҙәк урамына ҡуҙғалды. Шахмат, шашка һөйөүселәр клубта, балалар тышта саф һауала төрлө уйындар уйнаны.

Һуңынан ярыштарҙа ҡатнашыусыларға иҫтәлекле бүләктәр тапшырылды. Байрамды ойоштороуҙа күрһәткән ярҙамдары өсөн бағыусылар Флариса Фәтихова, Рәзимә менән Радик Мөхәмәтйәновтар, Рита Һаҙыева һәм клуб мөдире Минзилә Ҡазихановаға, шулай уҡ эҫе сәй әҙерләүсе апайҙарға ҙур рәхмәт белдерәбеҙ.  

Хәрби-патриотик йырҙар Тыуған илгә һөйөү, ватансылыҡ рухын тәрбиәләүҙә ҙур әһәмиәткә эйә. 1941 – 1945 йылдарҙағы Бөйөк Ватан һуғышында ата-олатайҙарҙың ҡаһарманлығын, афған һәм чечен яуҙарында егеттәрҙең хәрби батырлыҡтарын данлап байтаҡ йырҙар ижад ителгән, күпме кинофильмдар төшөрөлгән.

Конкурстың йомғаҡлау концертында 4 ансамбль һәм 11 йырсы сығыш яһаны. Әйтергә кәрәк, бында мәктәп уҡыусылары, йәштәрҙән тыш, Чечнялағы хәрби бәрелештәрҙә булған Вадим Хисбуллин да ҡатнашты. Мәсетле ауылы яугиры “Майский вальс” йырын башҡарып, райондың хәрби хәрәкәттәре ветерандары берлеге исеменән сығыш яһаны. Урмантауҙан Алина Ғафарова “Я живу в Заповедном краю”, Лағырҙан Илдар Ғәлимов – “Я служу России”, Малаяҙҙан Мария Чистякова “Ах, эти тучи в голубом” йырҙарын яңғыратһа, кесе төркөмдә Тирмәндән Вилнур Төлкөбаев “Офицеры”, Арҡауылдан Алия Мөхәмәтйәнова – “Это просто война”, Земфира Фәтихова – “Я хочу, чтобы не было войны”, Нәсибаштан Гөлсинә Әхмәтова “Алеша” һ.б. яңғыҙ башҡарыусылар хәрби тематикаға ҡараған йырҙар аша үҙ һәләтен күрһәтте. Ансамблдәрҙе Мөрсәлимдән “Зарница”, Янғантауҙан “Созвездие”, Малаяҙҙан “Надежда” төркөмдәре тәҡдим итте. Мөрсәлим ауылынан “Йәшлек” дуэты “Кукушка” (“Битва за Севастополь” фильмынан) йырын башҡарҙы. Конкурста башлыса тик русса йырҙар ғына булды.

Быйылғы “Бөйөк Еңеүгә Дан!” патриотик йырҙар бәйгеһе Рәсәй киноһы йылына бағышланды. Йырсылар сығышы социаль видеороликтар, хәрби документаль фильмдар, анимациялы кинофильм менән байытылды. “Илнур һәм Нәсимә” дуэты юморы ла тамашасылар күңелен күтәрҙе.