Archive

Әлкә ауылында ойошторолған бокс секцияһы бөгөн  уңышлы эшләп килә. Тренерҙары  Руслан Низамов малайҙарға был спорт төрөнөң төрлө алымдарын төшөндөрә. Секцияла шөғөлләнгән балалар үҙҙәрен төрлө ярыштарҙа һынай. 

Яңыраҡ Ҡатау-Тамаҡ ҡалаһының спорт һарайында Чечняла хәрби бурысын үтәгәндә   һәләк булған Сергей Юмуковтың иҫтәлегенә бокс буйынса турнир үткәрелде. Ярышта Златоуст, Һатҡы, Йүрүҙән, Кропачево һәм башҡа Силәбе өлкәһенән килгән спортсылар ҡатнашты. Беҙҙең Салауат районы командаһы ла был турнирҙан ситтә ҡалманы. 

Ярыш бик ҡыҙыу булды. Бокссылар бер-береһен ринг буйлап йүгертә-йүгертә, "нокаут" менән еңә барҙы. Беҙҙең егеттәр ҙә бирешмәне, улар үҙҙәрен көслө, түҙемле спортсы итеп танытты. Бигерәк тә 1-се класта ғына уҡыған Нурислам Низамовтың (һүрәттә) көслө бокссы булыуы һоҡландыра. Уға ауырлығы юғары булғанлыҡтан, йәшкә үҙенән күпкә ҙурыраҡ   4-cе, 5-се класта уҡыған спортсылар менән алышырға тура килде. Әммә Нурислам бирешмәй, дәғүәселәрен еңә барып, 2-cе урынға сыҡты. Шулай уҡ Яхъя урта мәктәбенең 8-се класс уҡыусыһы Вадим Хәйруллин һәм Әлкә урта мәктәбенең 7-се класс уҡыусыһы Илнур Низамов та маҡтауға лайыҡ. Улар турнирҙа яҡшы һөҙөмтәләр күрһәтеп, шулай уҡ 2-cе урын алды. 

 – Артабан районда был спорт төрөн нығыраҡ үҫтерергә ниәтләймен. Сентябрҙән бокс секцияһына йөрөргә теләүселәр күберәк булыр, тип уйлайым,  – тине Руслан Ғәлимйән улы. 

Егеттәрҙе был еңеүҙәре менән ҡотлап, уларға уңыштар теләйбеҙ. 

Яҙын, һауа температураһының ҡапыл күтәрелеүе һәм ҡарҙың тиҙ иреп йылғаларға ағыуы арҡаһында, һыу баҫыу ҡурҡынысы килеп тыуа.

Ташҡындың төп сәбәптәре: оҙайлы ҡойма ямғырҙар, ныҡлап ҡар иреүе, өйәр һыуҙарының йылғаға төшөүе, боҙ тығындары, гидротехник ҡоролмаларҙың йырылыуы, ер аҫты һыуҙарының күпләп өҫкә сығыуы. Тәбиғәттең был кире холҡона әҙер булыу өсөн ташҡын осоронда үҙеңде тотоу ҡағиҙәләрен белергә кәрәк.

Ғаилә ағзаларын ойошторолған һәм индивидуаль эвакуациялауҙа үҙ-үҙеңде тотоу ҡағиҙәләренә төшөндөрөгөҙ. Шулай уҡ ҡапыл һәм ныҡлап килеп тыуған һыу баҫыу мәлендә ни эшләргә кәрәклегенә лә өйрәтегеҙ.

– барлыҡ эре һәм ҡиммәтле әйберҙәрҙе сарҙаҡҡа йәки башҡа хәүефһеҙерәк урынға күсерергә;

– йорт хайуандарын да ҡурҡыныс булмағаныраҡ ергә ҡыуырға;

– мөгәрәптән запас аҙыҡ-түлекте сығарырға;

– ихаталағы кәрәк-яраҡты һыу ағыҙып китмәҫлек урынға алып ҡуйырға;

– төҙөк булған йөҙөүсе ҡулайламаны – кәмә, һалды әҙер тоторға кәрәк.

– ҡиммәтле әйберҙәр, документтар һәм иң тәү кәрәкле предметтар һалынған сумка (рюкзак);

– өс көнгә етерлек аҙыҡ-түлек запасы, йылы кейемдәр, гигиена сараларын полиэтилен пакетҡа төрөргә;

– аптечка, шәм, запас батареялары менән фонарик; 

– йорт-ҡаралтыны боҙолоуҙан һаҡлау өсөн инвентарь;

– өй ҡыйығы йәки сарҙаҡҡа менергә баҫҡыс, шулай уҡ уны йәшенгән урындан ҡотҡарыу сараһына күсеү өсөн дә ҡулланырға мөмкин.

Әгәр йортоғоҙҙо һыу баҫһа…

– газ, һыу һәм электр утын һүндерергә;

– мейесте һүндерергә;

Үткән аҙна фажиғәле булараҡ халыҡ хәтерендә уйылып ҡалды. 19 мартта Дондағы Ростов   аэропортында самолет шартланы. Дубайҙан осоп килгән самолет насар көн торошо булғанлыҡтан, ике сәғәт аэропортҡа төшә алмай, буран тынғанын көтөп һауала осҡан. Бер ни тиклем ваҡыттан һуң командир самолетты төшөрә башлай, тик ул ергә бәрелеп  шартлай. Үкенескә күрә, самолетта береһе лә тере ҡалмай, 62 кеше һәләк була. 

Дондағы Ростов   “бураны” ял көндәрендә Башҡортостанға ла килеп етте. Күҙ асып торғоһоҙ ҡар яуып, юлдарҙы йөрөп булмаҫлыҡҡа әйләндерҙе, күп кенә ауылдарҙа көслө ел сығып, уттарҙы һүндерҙе. Хәйбулла районында хатта фажиғә лә булған. Ике үҫмер кисен бер ауылдан икенсе ауылға ҡайтырға сыҡҡан. Тик егеттәрҙең береһе йортона ҡайтып етә алмай. Уның үле кәүҙәһе икенсе көндө ҡар аҫтында табыла. 

Бәхеткә күрә, беҙҙең районда кеше юғалыу осрағы теркәлмәне. Ҡоторған ел йорттарҙың ҡыйыҡтарын   алып ташланы. Ҡалмаҡ ауылында Зиннәтовтарҙың магазин  башының (һүрәттә), Малаяҙ башҡорт гимназияһының ҡыйығының бер өлөшөн осороп алып китте. Шулай уҡ Әлкә ауылында яңы ғына йорт һалып кергән Ильмир Ғәйнет­диновтарҙың верандаһының ҡыйығы ҡаза күрҙе. 

Был аҙнала район етәкселегенең ауылдарға сығып, халыҡ менән осрашыуҙары башланды. Унда, ғәҙәттәгесә, райондың былтырғы социаль-иҡтисади торошо, башҡарылған эштәр, киләсәккә пландар тураһында мәғлүмәт биреү, урындағы ауыл биләмәһе башлығының йыллыҡ отчетын, төркөм составындағы ойошма-учреждение вәкилдәренең сығышын тыңлау ҡаралған. Осрашыу мәлендә халыҡ та етәкселәргә, белгестәргә үҙ һорауҙарын бирә ала.

Дүшәмбе көндө район хакимиәте башлығы Ғәли Хәйретдинов етәкселегендәге мәғлүмәт-аналитик төркөм осрашыуҙы Әлкә һәм Ишембай ауылдарынан башланы. Икеһе лә ауыл биләмәһенең үҙәге булыуға ҡарамаҫтан, халыҡ әллә ни күп йыйылмағайны. Килгәндәрен дә уҡытыусылар, балалар баҡсаһы, мәҙәниәт хеҙмәткәрҙәре кеүек бюджет урындарында эшләгәндәр, йәмәғәт ойошмаһында торған ауыл активистары ла, бер нисә әүҙемерәк ветерандар тәшкил итте. Ирекһеҙҙән, халыҡ шул тиклем битарафмы, әллә кешеләр бындай осрашыуҙар файҙаһыҙ тип уны инҡар итәме, тигән һорау тыуа.

Әлкәлә һәр йылдағыса шул уҡ проблемалар ҡала килә: халыҡ ауылға яҡын урмандан ағас ала алмай, газ үткәрелмәй, кеҫә телефоны элемтәһе насар. Быларҙы хәл итеү барыһы ла аҡсаға килеп төртөлә. Өҫтәүенә, ауыл биләмәһенең алдағы башлығы Урал Дәүләтшин әйтеүенсә, төрлө төҙөкләндереү эштәренә тотонолған сығымдан ярайһы ғына суммала бурыс ҡалған. Быны хәҙерге урындағы башлыҡ Руслан Низамовтан түләүҙе талап итерҙәрме? Аныҡ яуап биреүсе булманы. Ауылдарҙағы клубтарҙы ремонтларға кәрәк, бигерәк тә Йонос мәҙәниәт усағы төҙөкләндереүгә мохтаж. Райондың мәҙәниәт бүлеге начальнигы Жәмил Мөхәррәмов  был эште хужалыҡ ысулы һәм халыҡ менән өмә эшләп кенә атҡарып сығырға мөмкин тине. Сөнки кеше яллар өсөн йәнә финанс етеңкерәмәй.

Ишембайҙа емерелгәндән бирле инде дүртенсе йыл айырым клуб юҡ. Әле ул ваҡытлыса икенсе бинала  урынлашҡан.

Февраль һәм март айҙары башҡорттарҙың милли спорт төрө – көрәш буйынса үткәрелгән ярыштарға бай булды. Беҙҙең Салауат районы егеттәре был турнирҙарҙа әүҙем ҡатнашып, һынатманы.

19-20 февралдә Октябрьский ҡалаһында үткән турнирҙа Янғантау ауылынан Максим Манкеевич чемпион исемен яулап, республиканың йыйылма командаһына инде. Ул Башҡортостандың һәм Салауат районының данын Рязань ҡалаһында яҡлаясаҡ. 

3-4 мартта Өфөлә Башҡортостандың атҡаҙанған физик культура хеҙмәткәре Гөлүс Әғзәмов  иҫтәлегенә ойошторолған турнирҙа беҙҙең команда ла көсөн һынаны. Һөҙөмтәлә  31 команда араһынан беҙҙең спортсылар 2-се урын яуланы. Егеттәр  Айнур Сәйетғәлин (Мөрсәлим) 2-се, Алмаз Баһауетдинов (Арҡауыл),  Илнур Мостафин (Лағыр) 3-сө урынға лайыҡ булһа, Илмир Вәлиев, Салауат Хужин, Артур Нурғужин  барыһы ла –  Лағырҙан, һәм Илфат Шәрәфетдинов (Әлкә) яҡшы һөҙөмтәләр күрһәтте. 

11-12 мартта Ҡырмыҫҡалыла генерал Миңлеғәле Шайморатовтың иҫтәлегенә бағышланған ярышта ла беҙҙең егеттәр республикала үҙҙәрен иң көслө, шәп спортсылар итеп танытты. 

Бил бирмәҫ, ныҡышмал спортсыларыбыҙ  Данил Ғимранов (Янғантау) 1-се, Батыр Мөхәмәҙиев (Тирмән) – 2-се, Вадим Фәссәхов (Лағыр) – 4-се, Дамир Ваһапов (Лағыр) – 3-сө, Илназ Ғәлимов (Таймый) 4-се урын яуланы. Чемпион исеменә лайыҡ булған Данил Ғимранов Ҡазан ҡалаһында үтәсәк турнирҙа ҡатнашып, Рәсәйҙең иң көслө спортсылары менән көс һынашасаҡ. Яҡташтарыбыҙҙы еңеүҙәре менән ҡотлап, уларға тағы ла яңы үрҙәр, уңыштар теләйбеҙ.

Бөгөн Рәүил Бәширов  өсөн шатлыҡлы көндәрҙең береһе. Ни өсөн тиһегеҙме? Сөнки уға “Аманат” балалар журналының баш мөхәррире Сәлмән Ярмуллин Маҡтау  билдәһе һәм матур китап ебәргән.  2015 йылда “Аманат” журналы  үткәргән  “Мин донъяны һүрәтләйем”  конкурсында  Рәүил еңеүсе булды. 

Рәүил Бәширов Әлкә урта мәктәбенең 4-се класс  уҡыусыһы. Тик “4”-ле  һәм “5”-ле  билдәләренә генә өлгәшә. Уҡытыусыһы Юлиә Ғөбәйҙулла ҡыҙы Шәмсетдинова Рәүил тураһында тик йылы һүҙҙәр генә:  “Рәүил беҙҙең класта математика фәнен иң яҡшы белеүселәрҙең береһе.  Шулай уҡ  ул  һүрәт төшөрөргә ярата. Аҡыллы, ярҙамсы, уңған. Ниндәй генә эш ҡушыуға ҡарамаҫтан, ул һәр ваҡыт әҙер,” – ти.

Рәүил район күләмендә үткәрелгән конкурстарҙа ла әүҙем ҡатнаша. 2014-2015 уҡыу йылында символика эшләү буйынса, Еңеүҙең 70 йыллығына арналған һүрәттәр конкурсында башланғыс кластар араһында 1-се урын яуланы. Бик матур иншалар яҙа. Бына уның бер иншаһынан гәзит уҡыусыларға ла өҙөк килтерәм: “Беҙҙе, 4 баланы, үҙенең ҡанат аҫтына алған Гүзәл апайыбыҙға рәхмәтлемен, мин үҙ ғаиләмде таптым. Дуҫ, татыу йәшәйбеҙ, бер- беребеҙгә ярҙам итәбеҙ”. 

Алда Рәүилгә уҡыуында уңыштар    теләйем. Афарин!

Башҡорт  Илсекәйе мәҙәниәт йортонда  Мөрсәлим ауылы советы биләмәһендәге өс ауыл хал­ҡының  осрашыуына йыйылдыҡ һәм тамашасылар иғти­барына “Орсоҡ өмәһе”н тәҡдим иттек. Беҙ уны өс ауылдан йыйылған командалар араһында ярыш формаһында үткәрҙек. Башҡорт Илсекәйе ауылынан “Орсоҡ”,  Мөрсәлимдән “Оҫта ҡулдар”, Ҡарағол ауылынан “Йомғаҡ” командалары ҡатнашты. Һәр командаға алдан әҙерләнеп килергә өйгә эш бирелде: исем, девиз, эмблема, ҡотлау һүҙе.   Жюри ағзалары итеп һәр ауылдан берәр кеше һайланды. 

Байрамды Мөрсәлим ауыл биләмәһе  башлығы  Альберт Ямалетдин улы Садиҡов асып ебәрҙе.  “Орсоҡ өмәһе”ндә ҡатнашыусыларға уңыштар теләне. Шулай уҡ Мөрсәлим ауылы ағинәйе, ветерандар советы рәйесе  Финзира Надир ҡыҙы  Булатова ҡотлау һүҙҙәре менән сығыш яһаны.

Сараны әҙерләп алып барыусы Зилә Ишморатова һарыҡ йөнөнөң файҙаһы тураһында ҡыҙыҡлы  мәғлүмәт һөйләне. «Һарыҡтың ите, йөнө, тиреһе – барыһы ла файҙалы. Борон йөндән кейеҙ һәм тула баҫып, тирмә ҡорғандар,кейем теккәндәр.Йәш килендәрҙең бирнәһендә һарыҡ йөнөнән эшләнгән зиннәтле балаҫтар булһа,егеттәр ҡалымға һарыҡ биргән.Тиреһе дауа өсөн ҡулланылған, йәғни һалҡын тейҙергән кешене яңы һуйылған һарыҡ тиреһенә урап һалғандар,эс майын иретеп эсергәндәр,тәненә япҡандар. Сайырлы  һарыҡ йөнөн быуындар  һыҙлағанда бәйләгәндәр, баш ауыртҡанда мендәр эшләгәндәр,” – тине.

“Заман башҡа – заң башҡа”,   тип әйтергә күнекһәк тә, бөгөн дә һарыҡ йөнөнән  эшләнгән ҡорама юрғандар осрап ҡуя. Тимәк, йола әле лә дауам итә. 

Район гәзиттәре редакцияһын берләштергән предприятиеның юридик хоҡуғы бөтөрөлһә лә, был матур йолаға әүерелгән күсмә Кубокка мини-футбол ярышы быйыл да юғары кимәлдә ойошторолдо.

24-се күсмә Кубокка мини-футбол турнирына барлығы 18 команданың килеүе ошо спорт сараһының әле лә үҙ популярлығын юғалтмауын иҫбатланы. Ярышта йыл һайын ҡатнашҡан Малаяҙ ауылы, Арҡауыл ЛПУ-һы, “Янғантау” шифаханаһы, 113-сө ПУ, Малаяҙ башҡорт гимназияһы командалары менән бер рәттән Әлкә, Ишембай, Миндеш ауылдарынан футболсыларҙың өҫтәлеүе уйындың мәртәбәһен арттырҙы. Быйыл да Силәбе өлкәһенең Кропачево ҡасабаһынан уйынсылар сығыш яһаны. 

– Ҡар өҫтөндә мини-футбол ярышы командаларҙы берләштерә, йәштәрҙе физик яҡтан сыныҡтыра. Редакция кубогына йыл һайын күпләп уйынсылар йыйылыуы һәйбәт күренеш, – тине район башлығы Ғәли Хәйретдинов тантананы асыу мәлендә. Унда райондың спорт һәм туризм комитеты рәйесе Илдар Фәйзуллин, Салауат районы мәғлүмәт үҙәге директоры Илгиз Әхмәтйәнов ҡатнашты. “Берҙәм Рәсәй” партияһының урындағы башҡарма комитеты етәксеһе Маргарита Сәфәрғәлина, ярышты ойоштороусыларҙан тыш, партия исеменән уйынсыларға бүләктәр килтергәйне. Былтырғы күскә Кубокты яулаусы эске эштәр бүлегенең “Барс” командаһының капитаны Ришат Шаһаев флагты күтәргәс, турнир башланды. 

"Салауат һылыуы  – 2020" гүзәллек бәйгеһендә башҡорт, татар, рус сибәркәйҙәре араһында үтте .

Башҡортостан Республикаһы буйынса Эске эштәр министрлығы күрһәтмәһенә ярашлы, 16-нан 25 мартҡа тиклем сираттағы “Бурыслы” профилактик операцияһы үтә.

Сара барышында полиция хеҙмәткәрҙәре административ штрафтарын түләмәгән граждандарҙың йорто буйлап йөрөйәсәк. Бурысын түләмәүселәргә ҡарата етди санкциялар ҡулланыласаҡ. Граждандарҙы һәр төрлө хоҡуҡ боҙоуҙары өсөн административ яуаплылыҡҡа тарттырыу енәйәтселекте иҫкәртеүҙең бер ысулы ул. Эске эштәр бүлеге был йүнәлештә билдәле эш башҡара. 2020 йылдың 2 айында бүлек хеҙмәткәрҙәре 178 гражданды административ яуапҡа йәлеп итте. Шуның 9-ы ваҡ хулиганлыҡ, 94-се – алкоголгә ҡаршы ҡануниәтте боҙғанға, 15 граждан административ штрафтарын түләмәгәне өсөн яуаплылыҡҡа тарттырылды.

Ошо хоҡуҡ боҙоуҙар өсөн бөтәһе 54 000 һум суммала административ штраф һалынған, уның 17 000 һумы ғына түләтелгән. Айырым граждандар штрафтарын ваҡытында түләргә теләмәй. Ғәмәлдәге закон буйынса ундайҙарға 1000 һумдан кәм түгел штраф, мәжбүри эш йәки 15 тәүлеккә тиклем административ арест кеүегерәк етди яза ҡулланыла. Штрафын ваҡытында түләмәүселәргә ҡарата суд приставтары хеҙмәтенә ебәрелә, бурыс мәжбүри ҡайтартыла. Үҙ-үҙеңә өҫтәмә мәшәҡәт тыуҙырмаҫ өсөн административ штрафты ваҡытында түләргә кәрәк, ә иң яҡшыһы законды боҙмай ғына тыныс йәшәргә.